Rom 16 | KYG | STEP | Nagaemo lasatimo'a Fipi'mo Senikali kotega siosi ali'ya'mo ne'aliya a kanomo lapakaemo ha maesayafe'mo agi'ale'mo ali'na asaga hu'na ategesuve.

Romans 16

Ge apamamae'niya gemae

1 Nagaemo lasatimo'a Fipi'mo Senikali kotega siosi ali'ya'mo ne'aliya a kanomo lapakaemo ha maesayafe'mo agi'ale'mo ali'na asaga hu'na ategesuve. 2 Agaemo asole vaya'e nagae'e'mo laha mae'niya'mofe'mo lapakaemo na ya'mo ha maetapa amisaya ya'mo hane'nisifi afa'a ha maetapa amiyo. Apaote vaya'mogi nehaya agufa alagepa kava'mo hutapa Ala kava ne'mo agi'alefe'mo alita falu fala hutapa ateteta yagaitapa ateyo. 3 Pilisila'e Akuvila'e'mo Kalaisi Yesu ali'ya'amo nagae'e'mo ne'ali'a yalavelafe'mo, Polo'a ge lanamamae'niye, hutapa hana paita nateyo. 4 Anakaemo ofali'na afa'a maisuvafe'mo fali'ana natesa'afe'mo alo hu'ana mai'na'a'mofe'mo nagaemo hanao ke nehoge'anae'mo muki alu nofi siosi vaya'mogi'e'mo hanao ke'mo neha'ae. 5 Ani kava hutapa no'anifi'mo ali'a anupa hu'a ne'maiya siosi vaya'aife'mo, Polo'a ge lapamamae'niye, hutapa hapa paitapa nateyo. Nahau nayamopafi'mo nahau'niya vekamo Epinitasi'a hogoteno Akaiya kotega Kalisitini vekamo hamale'niya vekae'mo, Polo'a ge kamamae'niye, hutapa ha paitapa nateyo. 6 Maliya'a laha maesiyafe'mo lusi ali'ya'mo ali'niya afe'mo, Polo'a ge kamamae'niye, hutapa ha paitapa nateyo. 7 Atalonikasi'e Yuniyasi'efe'mo, Polo'a ge lanamamae'niye, hutapa hana paitapa nateyo. Nagaemo Kalaisipi'mo o'mai'nova afina'mo hogote'ana Kalaisipi'mo mai'na'a vekalane. Anakaemo nagae nofi vekala'mo mai'ne'ana mago afina'mo nagae'e'mo magokepi kalavusifi'mo mai'na'ae. Anakaemo apa vayapati'mo ala anaki vekalane. 8 Ala kava nepi'mo mai'niya vekamo Apaliyetasife'mo nahau nayamopafi'mo nahau'niya vekae'mo, Polo'a ge kamamae'niye, hutapa ha paitapa nateyo. 9 Epani'a Kalaisi ali'ya'amo lagae'e'mo ali'niya veka'e Setekisi'efe'mo nahau nayamopafi'mo nahau'niya vekala'anife'mo, Polo'a ge lanamamae'niye, hutapa hana paitapa nateyo. 10 Apelisi'a Kalaisi'mo o'ataleno akame hu'niya'mofe'mo agimo hane'niya vekae'mo, Polo'a ge kamamae'niye, hutapa ha paitapa nateyo. Alisitomulasi afamo anaga'aife'mo, Polo'a ge lapamamae'niye, hutapa hapa paitapa nateyo. 11 Nagae nofi vekamo Helotiyanife'mo, Polo'a ge kamamae'niye, hutapa ha paitapa nateyo. Nasisi afamo anaga'amogimo Ala kava nepi'mo mai'naya vaya'aife'mo, Polo'a ge lapamamae'niye, hutapa hapa paitapa nateyo. 12 Talaifina'e Talaifasa'e'mo Ala kava ne'mo ali'ya'amo ne'ali'a atala'anife'mo, Polo'a ge lanamamae'niye, hutapa hana paitapa nateyo. Pesisife'mo siosi vaya'mogimo hapau apayamopafi'mo hapau'niya a kanomo Ala kava netefe'mo lusi ali'ya'mo ali'niya afe'mo, Polo'a ge kamamae'niye, hutapa ha paitapa nateyo. 13 Lufasi'a Ala kava nepi'mo hogoteno mai'niya vekae'mo, Polo'a ge kamamae'niye, hutapa ha paitapa nateyo. Ita'amo'mo ita'nimokana huno mai'niye. 14 Asikalitasi'agi Falikoni'agi Hemasi'agi Patolopasi'agi Hemesi'agi hu'a apakaegi'e'mo magokepi lokae'a mai'naya konagatimogi'efe'mo, Polo'a ge lapamamae'niye, hutapa hapa paitapa nateyo. 15 Filogasi'agi Yuliya'agi Neliyasi'agi Neliyasi asa'amo'agi Olipasi'agi hu'a apakaegi'e'mo muki vaya'amo magokepi lokae'a mai'naya apaote vaya'aife'mo, Polo'a ge lapamamae'niye, hutapa hapa paitapa nateyo. 16 Lapaote kava'mo hutapae'mo konagatapimogimo hapaetapa netetapa ge apamamaeyo. Muki haopalegamo ali'a anupa hu'a ne'maiya siosi vaya'mogi'e'mo ge lapamamae'nae.

Mago vaya'mogimo siosimo ali'a fako nehaya vaya'aife'mo apava gemo hu'niya gemae

17 Konaga'nimogitapae, ali'na he ti'na lapatesuvafe'mo huvanagi mago vaya'mogi lapakaemo afi'naya gelefe'mo kame hu'a atete'a ali'a fako hu'a lapatege hosu kava'mo hisayafe'mo lapayate'mo alige nehaya vaya'aife'mo alagepa hutapa yagaita mai'netapae'mo maitapa halove huta maiyo. 18 Ani agufa vaya'mogimo Ala kava netimo Yesu Kalaisi ali'ya'amo no'alifa amega apakufamo'mo hau'niya kava'mo akame nehae. Haga hapausiya agufa gemo hute'a aigofe ge'apileti'mo hapao ke he'a apametala hute'a fiku ne'afiya vaya'mo apakesa nefaiye. 19 Muki vaya'mogimo lapakaemo alagepa hutapa gemo afitetapa akame nehaya kavafe'mo lapava gemo ago afi'naya'mofe'mo namogaga ai'na nelapatove. Afi'naya'monanafa lapakaemo alagepa kava'mo hisayafe'mo afi'naya lapaipa lapakesa alisayafeke'mo nahau'niya'monanafa hosu kava'mo osisayafe'mo o'afi'naya vayakana hutapa maisayafe'mo nahau'niye. 20 Goti'a alagepa huta ne'mauna kava'mo aepa vekamo'a malage huno Satani'mo lapaiya afe'alumelagamo alino aeno latapaigiye. Ala kava netimo Yesu Kalaisi'a fiku lapa maeno lapamino. He, Lama ge.

21 Timoti'a nagae'e'mo lokaeta'a ali'ya'mo ne'alu'a veka'e nagae nofi vaya'mo Lusiyasi'agi Yesoni'agi Sosipata'agi hu'a ge lapamamae'nae. 22 Nagaemo Tetiyusi'namo mani gemo Polo avayafati'mo ali'na avo kae'nae'mo Ala kava nepi'mo mai'ne'nae'mo ge lapamamae'nove. 23 Gaiyasi'a Polo'nale'mo alagepa huno yagaino nate'niya veka'e no'afi'mo ali'a anupa hu'a mai'naya siosi vaya'mogi'e'mo ge lapamamae'nae. Elasatasi'a taonifi monile'mo ne'yagaiya veka'e Kuvotasi'a konagatimo'e'mo ge lapamamae'na'ae. 24 Ala kava netimo Yesu Kalaisi'a muki'amogitapamo fiku lapa maeno lapamino. He, lama ge.

Goti agi'ale'mo alino asaga huno ate'niya gemae

25 Goti'a nagaemo ae'na hakalo nehuva alagepa faigoko ge'aleti'e Yesu Kalaisife'mo ava gemo ae'a hakalo nehaya ge'aleti'e'mo afa'a alino lokiya vaino lapategaiye. Ma mopamo alo hu'niya afinateti'mo ani gemo fala kino haneme haneme e'niya'monanafa 26 hemenimo Gotitegati gemo alini e'a ae'a hakalo hu'a hapa nepaiya vaya'mogimo avo kae male'naya gemo alagepa faigoko ge'amo ha le yategamo ago afole ai'niye. Maige maige huno ne'maiya auneme'e Goti'a, alita aeta hakalo hiyo, huno hu'nige'a muki nofi vaya'mogi apakesa afi'a fatago hisaya gemo akame hisayafe'mo ali'a ae'a hakalo hu'a hapa pai'nae. 27 Agaemo magoke Goti'a agai'age'mo muki ya'amo ageno aeto hu'niya vekamo agi'ale'mo Yesu Kalaisiteti'mo ali'a asaga hume asaga hume u'a ali'a asaga hu'a hano osu'a ali'a asaga hiyo. He, lama ge.